Hū Puia
Ko te hū puia te tino whīwhiwhi rawa atu o ngā aituā taiao, a he nui anō ngā pūmate ka whakaputaina e rātou. Kei roto i ēnei pūmate ko:
- Ngā awa tahe puia
- Ngā mātia muramura, arā ngā makanga a te puia
- Ngā hūnga hau, arā ngā hūnga kapua wera tonu he nui atu nei te tere ki te whenua
- Ngā hau puia
- Te marangai waikawa
- Ngā rerenga rangitoto, arā, ngā awa o te paruparu puia
- Ngā roto pākaru
Nā te nui o ngā pūmate puia, me te taikaha hoki o ēnei, ka nui ake ngā tāngata e mate ana i te hū puia.
I mua i tētahi hū puia
Mā te takatū i mua i te pānga o te tūpuhi e āwhina kia iti ake te wāwāhitanga o tō kāinga me tō pakihi, kia ora anō hoki koe.
- Tirotirohia mēnā kei tētahi takiwā puia koe e noho ana, he aha hoki ngā pūmate ka pā pea ki a koe
- Mēnā e noho ana koe i tētahi wāhi tērā e pā ai he awa tahe puia, me mōhio koe ki tētahi ara tere ki te wāhi haumaru
- Kōrero ki tō Rōpū Whakahaere Whawhati Tata o te Rākau Whakamarumaru mō tā rātou tikanga whakatūpato i a koe i tētahi hū puia
- Whakatakotoria he Mahere Whawhati Tata mō te Whare, whakaritea hoki he Kete Whakaora Whawhati Tata, e taea e koe te ora ko tō kotahi mō te toru rā neke atu
- Me whakamahere anō e koe ngā mea e hiahia ana koe i roto i tō Kete Rere mo te tūpono ki te whakatahi
Ki te whakatuma he hū puia
- Ki te whakaae ngā tohunga puia kei te whakatuma mai he hū puia, ka pāpāhotia he Whawhati Tata Rākau Whakamarumaru, ā ka whakatahitia atu te takiwā pūmate
- Whakarongo ki tō reo irirangi mō ngā pārongo, ka whai i ngā tohutohu a Te Rākau Whakamarumaru
I te wā o te hū puia
- Whakakīa tō kauranga ki te wai, ngā peihana, me ngā paepae wai i te wā tīmata. Tērā pea ka tūkinotia tō putunga wai pūtake i te parahanga
- Mauria ō mōkai kararehe ki rō whare, ka noho i rō whare i ngā wā katoa mēnā e taea
- Ki te haere koe ki waho, whakamaua he ārai puehu, he ngungu karu. Mā tēnei e ārai i te ngārehu i ō karu, i ō pūkahukahu
- Tahitahitia ngā kōrere me tō tuanui i te ngārehu. Kei horo te tuanui i te kaha taumaha o te ngārehu
- Whakawetohia te hiko, katia te kapuni i te pūtake
- Kaua e haere atu i tō whare kia kīa rā anō koe e ngā kātipa o te Rākau Whakamarumaru
I muri i te hū puia
- Kaua e hoki ki tō whare kia kīa rā anō koe e ngā kātipa o Te Rākau Whakamarumaru kei te haumaru
- Ki te pāngia tō whare e te hū puia, karangatia kia tirotirohia tō whare, kia tātaitia te wāwāhitanga
Pēhia a konei mō ētahi atu pārongo mō ngā takiwā puia o Aotearoa