Tokangaekina ‘o e kau mahaki΄ pe fa‘ahinga kakai pelepelengesi΄

Kapau ‘oku ‘i ai ha faingatā‘ia fakaesino, ‘o koe pe ko ha mēmipa ‘o ho fāmili΄ pe ‘i ho komiunitii΄, ‘ai ha palani ‘i he taimi΄ ni mo ha mēmipa, kaungāme‘a pe kaungā‘api ke ne tokoni ‘i ha hoko ‘a ha me‘a fakatu‘upakē.

Tuli pe ‘ikai fanongo lelei

Ko kinautolu ‘oku tuli pe ‘ikai lelei ‘enau fanongo΄, ‘e ngali he ‘ikai tenau ongo‘i ‘e kinautolu ‘a e ngaahi founga fakatokanga pe ko ha ngaahi fanongonongo ‘i he letiō. ‘Ai ha palani ke fakapapau‘i ‘oku fakahoko atu ‘a e fanongonongo΄ ki ha taha pehē ni ‘i ha taimi ‘o ha hoko ‘a ha me‘a fakatu‘upakē.

Kui pe ‘ikai lelei ‘a e sio΄ pe vakai΄

‘E lava ke faingatā‘ia ha fa‘ahinga ‘oku nau kui pe ‘oku ‘ikai lelei ‘a ‘enau sio΄ pe vakai΄ ‘o kapau ‘e fiema‘u ke nau fetukutuku pe mavahe atu ki ha Senitā ki he Malu‘i Fakasivile΄ ‘a ia ‘oku ‘ikai ke nau maheni ki ai. Fokotu‘utu‘u ha taha ke na “ngāue tauhoa” koe‘uhī ke ‘i ai ha taha ke tokoni atu kiate kinautolu.

Puke ‘i he hela΄ mo e ngaahi faingatā‘ia felāve‘i mo e mānava΄

‘E ala uesia ha taha ‘oku puke ‘i he hela΄ pe ha taha ‘oku faingatā‘ia ‘a ‘ene mānava΄ ‘i he efu ‘oku puna mei΄ ha mo‘ungaafi, ‘e ha efu pe ko ha‘anau mafasia ‘i ha hoko ‘a ha me‘a fakatu‘upakē. Kapau ‘oku΄ ke tauhi ha taha ‘oku΄ ne ma‘u ‘a e ngaahi faingatā‘ia ko eni΄, fakapapau‘i ‘oku lahi ‘a ‘ene ngaahi faito‘o΄ mo e ngaahi me‘a mānava΄ ‘i ho‘omou puha ‘oku fa‘o ai ‘a e Naunau Fiema‘u Fakavavevave ki he Mo‘ui΄ pea mo ho‘omou Naunau Hola Fakavavevave΄.

Ngaahi fiema‘u me‘atokoni makehe

Kapau ‘oku΄ ke tauhi ha taha ‘oku ‘i ai ha‘ane fiema‘u me‘atokoni makehe, fakapapau‘i ‘oku΄ ke fakakau ha‘anau me‘akai ‘i ho‘omou Naunau Fiema‘u Fakavavevave ki he Mo‘ui΄.

Mamatea pe Faingatā‘ia ‘a e ngaue takai holo΄

‘E fiema‘u ke ke fakakau atu ki ho‘omou Naunau Fiema‘u Fakavavevave ki he Mo‘ui΄ ha ngaahi naunau tokoni ki he ngaue takai holo΄ ‘o kapau ‘oku΄ ke tauhi ha taha ‘oku mamatea pe faingatā‘ia ‘a ‘ene ngaue takai holo΄. ‘E tokoni atu eni ki he tokotaha΄ ni ke ne makupusi ha faingata‘a ‘i ha fiema‘u ke nau fetukutuku atu ki ha feitu‘u kehe.