Mofuike

Ko e fakatamaki te ke ngali fekuki mo ia ‘i ha tō ‘a ha mofuike ko ha ngaahi me‘a ‘e ala holofa pe ngangana hifo, ‘o hangē ko ha holo ‘a ha ‘ū fale pe halafakakavakava. ‘Oku fiema‘u ke ke ‘ilo ‘a e ngaahi me‘a ‘e ngali fakatu‘utāmaki pehē ni΄ ke ke feinga ke hao ai.

‘Oku lauiafe ‘a e ngaahi mofuike ‘oku hoko ‘i Nu‘u Sila΄ ‘i he ta‘u kotoa pē, ka ko e konga lahi ‘o kinautolu ‘oku ‘ikai ke tau ongo‘i koe‘uhi ko e mofuike iiki, pe ‘oku fu‘u loloto ‘a e feitu‘u ‘oku hoko ai΄. ‘E lava pē ke hoko ha fu‘u mofuike ‘oku fakatupu maumau lahi ‘i ha fa‘ahinga taimi pē. Ko e taimi΄ ni ‘a e taimi lelei taha ke ke mateuteu ai΄. Muimui ki he fanga ki‘i sitepu faingofua ko ‘eni΄:

Kimu’a pea hoko ha mofuike

‘E tokoni ‘a ho‘o mateuteu kimu‘a pea tō ha mofuike΄ ke fakasi‘isi‘i ai ‘a e maumau ‘e hoko ki ho ‘api΄ pea mo ho‘o pisinisi΄ pea ‘e tokoni ‘eni ke ke hao mo‘ui ai.

• Fa‘u ha Palani ‘a e Fāmili΄ ki ha Fakatamaki ‘e Hoko Fakatu‘upakē pea teuteu‘i ha Naunau Fiema‘u Fakavavevave ki he Mo‘ui΄ koe‘uhī ke mou lava ‘o mo‘ui pē ‘iate kimoutolu ‘o a‘u hake ki he ‘aho ‘e tolu pe laka hake ai
• Vakai‘i pe ko fē ‘a e ngaahi feitu‘u malu ‘i ho ‘api΄, ‘apiako΄ pe ‘api ngāue΄. Ko ha feitu‘u malu ‘eni:
  • ‘i ha lalo tēpile kaufefeka, manatu‘i ke mou piki ki hono ngaahi va‘e΄
  • ‘i he tafa‘aki ‘o ha holisi ‘i loto ‘i he fale΄
  • ‘i ha feitu‘u ofi atu kiate koe, ‘o ‘ikai toe laka hake ‘i ha ngaahi fo‘i manga si‘isi‘i pē, pe mita ‘e ua mei΄ he feitu‘u ‘oku΄ ke ‘i ai΄, ke ke hao mei΄ ha ngaahi me‘a ‘oku ngangana hifo ki lalo
• Vakai‘i ‘a ho‘o malu‘i΄ ke ‘ilo pe ko e hā ‘a e me‘a ‘oku malu‘i΄ pea mo hono mahu‘inga΄
• Kumi ha fale‘i ‘a ha tokotaha mataotao ke fakapapau‘i ‘oku fakama‘u ‘a e fale΄ ‘i hono fakava‘e΄. Fakapapau‘i foki ko e ngaahi fakalelei ‘oku ‘amanaki ke fakahoko ki ho ‘api΄ ‘oku faipau ‘eni ki he ngaahi Tu‘utu‘uni ‘a Nu‘u Sila ki he Langa΄
• Fakama‘u ‘a e ngaahi naunau fale mamafa΄ ki he faliki΄ pe holisi΄. Lomi‘i heni ke fakapapau‘i ‘oku malu ho ‘api΄ mei΄ he mofuike΄

Lolotonga ‘a ha mofuike

• Kapau ‘oku´ ke ‘i loto ‘i ha fale, nga‘unu atu ‘aki ha ngaahi manga nounou pē, tō tangutu ki lalo, fakamalumalu ho ‘ulu´ ‘i ho nima´ pe toitoi ‘i ha lalo tēpile pea´ ke puke ma‘u ai.

• Kapau ‘oku΄ ke ‘i loto ‘i ha fale, nga‘unu atu ki ha feitu‘u malu
• Kapau ‘oku΄ ke ‘i tu‘a, ‘unu atu ‘i ha ngaahi fo‘i manga nounou pē ‘e fiha, pea΄ ke tō tangutu ki lalo, fakamalumalu ho ‘ulu ‘i ho nima΄ pea΄ ke puke ma‘u ai
• Kapau ‘oku΄ ke faka‘uli, afe ‘o tu‘u
• Kapau ‘oku΄ ke ‘i he matātahi΄ pe ofi ki ai, tō tangutu ki lalo, fakamalumalu ho ‘ulu ‘i ho nima pea΄ ke puke ma‘u ai pea΄ ke nga‘unu atu leva ki ha feitu‘u mā‘olunga ‘i he vave taha΄ koe‘uhī na‘a hoko ha sunami hili ‘a e mofuike΄

Hili ‘a ha mofuike

• ‘Amanaki atu ke ke kei ongo‘i ha kei ngalulululu ‘a e funga ‘o e fonua΄
• Kapau ‘oku lava pea΄ ke tokoni atu ki he ni‘ihi kehe΄
• Kapau ‘oku΄ ke ‘i ha fale kuo maumau, feinga ke ke hū ki tu‘a pea kumi ha feitu‘u ‘oku malu mo ‘ataa΄
• ‘Oua na‘a mou ō atu ke mamata ki he ngaahi feitu‘u kuo maumau‘i ‘e he mofuike΄
• Kapau ‘oku΄ ke nāmu‘i ha kasa, feinga ke tamate‘i ‘a e ma‘u‘anga kasa ‘i tu‘a ‘i he fale ko ia΄ ‘o kapau ‘oku hao mo malu pē ke ke fai pehē ni
• Kapau ‘oku΄ ke sio ki ha mofisifisi‘i afi, ngaahi uaea maumau pe faka‘ilonga ‘o ha maumau ‘a e ‘uhila΄, tāmate‘i ‘a e ma‘u‘anga ‘uhila mei΄ he puha fiusi΄ ‘o kapau ‘oku malu mo hao ke ke fai pehē ni
• Kapau kuo hoko ha maumau ki ho ‘api΄ mo ho‘o koloa΄, hiki lēkooti ha ngaahi fakamatala ki ai pea ‘ai mo ha ngaahi tā ki he ngaahi ‘uhinga fakamalu‘i
• Fakafanongo atu ki he letioo΄ ki ha ngaahi fakamatala mo ha fale‘i