Matangi Mālohi

‘Oku fakatupu ‘a e ngaahi matangi fakatupu maumau΄ ‘e he ngaahi saikolone, ‘ahiohio pe ngaahi feitu‘u ‘oku fu‘u tōlalo ai ‘a e ‘ea ‘o e ‘etimosifia΄ ‘i he funga fonua΄ ‘o tupu ai ha hakohako (pe deep depressions). ‘Oku tuku atu ‘e he potungāue fakamatala‘ea΄ pe MetService ha fakatokanga matangi mālohi ‘i he taimi kuo laka hake ai ‘a e mālohi ‘o e matangi΄ ‘i he kilomita ‘e 87 ‘i he houa ‘i he funga ‘o e fonua΄. Muimui ki he ngaahi sitepu ko ‘eni΄ ke ke hao ai mei΄ he ngaahi fakatu‘utāmaki ‘o e matangi mālohi΄:

Kimu‘a pea tō ha matangi mālohi

‘E hoko ‘a ho‘o mateuteu kimu‘a pea tō ha matangi mālohi ke fakasi‘isi‘i ai ‘a e ngaahi maumau ‘e hoko ki ho ‘api΄mo ho‘o pisinisi΄ pea ‘e tokoni foki ‘eni ke ke hao ai.

• Fa‘u ha Palani ‘a e Fāmili΄ ki ha Fakatamaki ‘e Hoko Fakatu‘upakē pea teuteu‘i foki ha Naunau Fiema‘u Fakavavevave ki he Mo‘ui΄ koe‘uhī ke mou ma‘u mo‘ui mei ai ‘o a‘u hake ki he ‘aho ‘e tolu pe lahi hake ai
• Fakapapau‘i ‘oku fakama‘u ‘a e ‘ato mo e ngaahi fakatali ‘o ho ‘api΄ ‘i he ta‘u ‘e ua kotoa pē
• Tauhi ha ngaahi naunau ke monomono‘aki ‘a e ngaahi matapā sio‘ata΄, ‘o hangē ko ha ngaahi tapoleni, lau‘ipapa, mo ha tepi fakapipiki
• Kapau ‘oku΄ ke lolotonga fakalelei‘i pe langa fo‘ou ho ‘api΄, fakapapau‘i ‘oku faipau ‘a e ngāue kotoa pē ki he ngaahi Tu‘utu‘uni ‘a Nu‘u Sila ki he Langa΄ ‘a ia ‘oku ‘i heni ‘a e ngaahi tu‘utu‘uni pau ke fakasi‘isi‘i‘aki ha hoko ‘a ha ngaahi maumau mei΄ ha matangi mālohi

‘I he taimi kuo ‘omai ai ha fakatokanga matangi

• Tufi ha ngaahi veve ‘oku ngangana takai ‘i ho ‘api΄ ‘a ia ‘e ala puhi ‘e he matangi΄
• Fakahū ki fale ‘a e ngaahi pini veve΄
• Fakahū ki fale ‘a e fanga monumanu tauhi΄. Hiki ‘a e fanga monumanu ‘oku faama‘i΄ ki ha feitu‘u ke nau malu ai
• Fakafanongo ki he letiō ‘i ho feitu‘u΄ ki ha fakamatala ‘e ma‘u mei ai

Lolotonga ‘a e tō ‘a ha matangi mālohi

• Fusi‘i ke mapuni ‘a e ngaahi puipui kotoa pē ke fakatuai‘i‘aki ha puna mai ‘a ha ngaahi sio‘ata mafahifahi pea mo ha ngaahi me‘a ‘e ifi mai ‘e he matangi΄
• Fakamama‘o mei΄ he ngaahi matapaa΄ mo e matapā sio‘ata΄. Kapau kuo kamata ke fakahoko ‘e he matangi΄ ha ngaahi maumau, mou toe ‘unu atu ki he loto‘i fale΄
• ‘Oua ‘e lue takai holo ‘i tu‘a. ‘Oua te mou faka‘uli ‘i ha me‘alele tukukehe kapau kuo fu‘u fiema‘u ‘aupito ke fai pehē ni

Hili ‘a ha matangi mālohi

• Fetu‘utaki atu ki he kōsilio fakakolo΄ pea mo ho‘o kautaha malu‘i΄ kapau kuo fu‘u lahi ‘a e maumau kuo hoko ki ho ‘api΄ pe fale΄
• Kole atu ki ho‘o kōsilio fakakolo΄ fekau‘aki mo ha fale‘i ki he anga ‘o hono fakama‘a ‘o e ngaahi kinoha‘a ‘o e matangi΄ ‘i ha founga ‘oku malu mo hao΄