Puna ‘a ha Mo‘ungaafi

Ko e ngaahi mo‘ungaafi΄ ‘oku kau ia ‘i he ngaahi fakatamaki fakaenatula ‘oku fihi taha΄ pea ‘oku lahi ‘a e ngaahi me‘a fakatu‘utāmaki ‘e ala hoko ai΄. ‘Oku kau ki heni ‘a eni:

• Tafe ‘a e anoafi΄
• Ngaahi me‘a ‘oku laku mai ki tu‘a ‘e ha mo‘ungaafi
• Ngaahi naunau ‘ahu ‘oku tafe vave mai ki he funga ‘o e fonua΄
• Ngaahi kasa mei΄ he mo‘ungaafi΄
• ‘Uha ‘ēsiti
• Tafe ‘a e pela-afi
• Pā ‘a e ngaahi anovai΄

Koe‘uhī ko e lahi mo e tu‘unga fakatu‘utāmaki ‘o e ngaahi me‘a ‘e ala hoko΄, ‘e lava ke fakatupu ‘e he puna ‘a ha mo‘ungaafi ‘a e mole lahi taha ‘a ha ngaahi mo‘ui.

Kimu‘a ‘i ha puna ‘a ha mo‘ungaafi

‘E hoko ‘a ho‘o mateuteu kimu‘a pea puna ha mo‘ungaafi ke fakasi‘isi‘i ai ‘a e ngaahi maumau ‘e hoko ki ho ‘api΄ pea mo ho‘o pisinisi΄ pea ‘e tokoni foki ‘eni ke ke hao ai.

• Vakai‘i pe ‘oku΄ ke nofo ‘i ha feitu‘u ‘oku ngalingali ke puna ai ha mo‘ungaafi pea ‘ai ke ke ‘ilo ‘a e ngaahi fakatu‘utāmaki ‘e ngali ke nau uesia koe΄
• Kapau ‘oku΄ ke nofo ‘i ha feitu‘u ‘e ngalingali tafe hifo ai ‘a e anoafi΄, fakapapau‘i ‘oku΄ ke ‘ilo ha hala fakavavevave ki ha feitu‘u ‘oku malu΄
• Talanoa mo e Kulupu Pule ki he Malu‘i Fakasivile ‘i ho feitu‘u΄ felāve‘i mo ha founga te nau ‘oatu‘aki ai ha fakatokanga kiate koe ‘i he taimi ‘e puna ai ha mo‘ungaafi
• Fa‘u ha Palani ‘a e Fāmili΄ ki ha Fakatamaki ‘e Hoko Fakatu‘upakē pea teuteu‘i foki ha Naunau Fiema‘u Fakavavevave ki he Mo‘ui΄ koe‘uhī ke mou ma‘u mo‘ui mei ai ‘o a‘u hake ki he ‘aho ‘e tolu pe lahi hake ai
• ‘Oku totonu foki ke mou palani atu pe ko e hā ‘a e me‘a te mou fiema‘u ke fakakau ‘i ho‘omou Naunau Hola Fakavavevave΄ koe‘uhī na‘a fiema‘u ke mou fetukutuku fakavavevave

‘I he taimi ‘oku tu‘unuku mai ai ke puna ha mo‘ungaafi

• Kapau kuo felotoi ‘a e kau mataotao ‘i he mo‘ungaafi΄ ‘e ngalingali ke puna ha afi, ‘e tuku atu leva ha fakatokanga fakavavevave ‘a e Malu‘i Fakasivile΄ pea ‘e fetukutuku leva ‘a e kakai΄ mei΄ he feitu‘u ‘oku ngali fakatu‘utāmaki΄
• Fakafanongo ki he letioo΄ ki ha ngaahi fakamatala mei ai pea muimui ki he ngaahi fale‘i ‘a e ‘Ōfisi ‘o e Malu‘i Fakasivile΄ mo e Ngaahi Fakatamaki Fakatu‘upakee΄

Lolotonga ‘o ha puna ‘a ha mo‘ungaafi

• Mu‘a fakatoka ha vai ‘i ho‘omou topu kaukau΄, ngaahi singi΄, ngaahi koniteina΄ pe tangikee΄. ‘E ngali ke faka‘uli‘i ‘o kona ‘a ho‘omou ma‘u‘anga vai angamaheni΄
• Fakahū ki fale ‘a ho‘omou ngaahi monumanu tauhi΄ pea mou nofo ma‘u ‘i fale ‘i he taimi lahi taha ‘e ala lava΄
• Kapau ‘oku fiema‘u ke mou hū ki tu‘a, tui ha pūlou efu mo ha matasio‘ata. ‘E malu‘i heni ho mata΄ mo ho ma‘ama‘a΄ mei he hū ki ai ‘a ha efu
• Tauhi ke ma‘a ‘a e ngaahi fakatali΄ mo e ‘ato΄ mei΄ he efu‘i afi΄. ‘E lava ke hoko ‘a e fu‘u mamafa ‘a e efu΄ ke holo ai ‘a e ‘ato ‘o ho fale΄
• Tāmate‘i ‘a e ‘uhila΄ mo e kasa΄ mei΄ he mita΄
• ‘Oua te mou mavahe mei homou ‘api΄ tukukehe kapau kuo fale‘i atu ‘eni ‘e he kau ngāue ki he Malu‘i Fakasivile΄

Hili ‘a ha puna ‘a ha mo‘ungaafi

• ‘Oua na‘a mou foki atu leva ki homou ‘api΄ tukukehe kapau kuo fakahā atu mei΄ he kau ngāue ‘a e Malu‘i Fakasivile΄ kuo fe‘unga ke mou fai pehē ni
• Kapau kuo uesia koe ‘e he puna ‘a e mo‘ungaafi΄, ‘ai ke sivi‘i mo fakamahu‘inga‘i ‘a e ngaahi maumau kuo hoko ki ho fale΄

Lomi‘i heni ki ha toe fakamatala lahi ange felāve‘i mo e ngaahi feitu‘u mo‘ungaafi‘ia ‘i Nu‘u Sila΄