Holofa ‘a e Funga Fonua΄

Ko e holofa ‘a e funga fonua΄ ‘oku ‘uhinga ia ki he holo hifo ‘a e maka΄ mo e kelekele΄ ‘i ha tafatafa‘i mo‘unga pe funga mā‘olunga. ‘E lava ke fakakalakalasi ‘a e holofa ‘a e fonua΄ mei΄ ha teka hifo ‘a ha fu‘u fo‘i maka lahi, ki ha holofa hifo ‘a ha fu‘u tu‘oni veve ‘oku huluni ai ‘a e makamaka mo e kelekele lahi, ‘a ia ‘e ala mafola ‘eni ‘i ha ngaahi laui kilomita.
‘E lava ke fakatupu ‘e ha fu‘u ‘uha lahi mo ha tāfea pe ko ha mofuike ha holofa ‘a e funga fonua΄. ‘E toe lava foki ‘e he ngaahi ngāue kehekehe ‘a kitautolu fa‘ahinga ‘o e tangata΄, ‘o hangē ko hono tutu‘u ‘o e ‘ulu‘akau΄, tu‘utu‘u ‘o ha konga fonua ke fa‘u ‘a e ngaahi hala΄ pe ko ha paipa vai ‘oku mama, ke tupu ai ha holofa ‘a e funga ‘o e fonua΄.

Kimu‘a pea holofa ‘a e funga fonua΄

‘E hoko ha‘amou mateuteu kimu‘a ‘i ha holofa ‘a e funga ‘o e fonua΄ ke fakasi‘isi‘i ai ‘a e maumau ‘e ala hoko ki ho ‘api΄ mo e pisinisi΄ pea ‘e tokoni eni ke mou hao ai.

• Vakai atu ki ho‘o kōsilio fakakolo΄ pe kuo ‘osi hoko nai ha holofa ‘a e funga ‘o e fonua΄ ‘i ho feitu‘u΄ ‘i ha taimi kimu‘a ange pea mo fē ‘a e feitu‘u ‘e toe ngalingali ke hoko ai ‘eni΄
• Vakai pe ‘oku ‘i ai ha ngaahi faka‘ilonga kuo ‘i ai ha ngaue ‘a e kelekele΄. ‘E kau atu ki he ngaahi faka‘ilonga΄ ni ‘a e:
  • Ma‘u ‘a e ngaahi matapaa΄ mo e pātimi ‘o e matapā sio‘ata΄
  • Kamata mafa‘afa‘a ‘a e ngaahi pātimi ‘o e fale΄ ‘o ‘ikai ke nau kei hao lelei
  • Nga‘unu pe nga‘eke ‘a e ngaahi laupapa nofo‘anga ‘i tu‘a΄ mo e fakafaletolo΄ ‘o mavahe mei΄ he fale΄
  • Papā pe ‘asi ha tafungofunga fo‘ou ‘i he kelekele΄, loto hala΄ pe halanga lue lalo΄
  • Tu‘u māle‘ei ‘a e ‘ulu‘akau΄, holo ‘a e ngaahi holisi langomaki΄ pe ngaahi ‘aa΄
  • Papā mai ha ngaahi matavai, ‘asi ha ngaahi matāmama pe toka‘anga vai ‘i he ngaahi feitu‘u ‘oku ‘ikai fa‘a fonufonu vai pehē kimu‘a΄

Kapau ‘oku΄ ke pehē ‘oku mei hoko mai ha holofa ‘a e funga ‘o e fonua΄
‘E fiema‘u ke ke ‘ilo pe ‘e anga fēfē ha‘o matatali ‘eni ‘i he vave taha΄

• Fetukutuku pea΄ ke ‘alu mo ho‘o Naunau Hola Fakavavevave΄
• Fetu‘utaki atu ki ho‘o ‘Ōfisi Pule ‘o e Malu‘i Fakasivile ki he Ngaahi Fakaetamaki Hoko Fakatu‘upakee΄
• Tala fakatokanga atu ki he ngaahi kaungā‘api ‘e ala uesia΄

Hili ‘a ha holofa ‘a e funga ‘o e fonua΄

• ‘Oua na‘a΄ ke foki ki ha feitu‘u kuo uesia ‘e ha holofa ‘a e funga ‘o e fonua΄ kae‘oua kuo ‘osi sivi faka‘auliliki ‘eni
• ‘Ai ha ngaahi tā pea hiki ha ngaahi fakamatala ke toki ngāue‘aki ‘a mui ki ha kumi fakafoki ‘o e malu‘i΄, ‘i he taimi kuo faingamālie mo malū ai΄